✍ یارالی دورنا

بیر یارالی دورنا دومان ایچینده
داغلاردان کئچیردی، گئجه گؤزونده
قاتاردان قالمیشدی، قاتی دوماندا
ایتیردی گئتدیکجه، اؤزو اؤزونده

سرحدلردن کئچدی، چؤللردن کئچدی
گؤیلرین بزه‌یی، یارالی دورنا
بیتمه‌دی اوزاق یول، بیتمه‌دی سفر
دوشدو قاتاریندان آرالی دورنا

ایتیردی یولونو، گؤزو قارالدی
گؤیدن یئره دوشدو، اوچا بیلمه‌دی
گؤلمج قیراغیندا، دایانیب قالدی
قوزئیدن گونئیه، کؤچه بیلمه‌دی!

یاراسیز یولداشی قاطار ایچینده
قوزئیدن گونئیه دوغرو اوچوردو
بیلمیردی یولداشی، یولدا قالیبدی
داغلاردان، چؤللردن، سرخوش کئچیردی

قاطارین سفری سونا چاتیردی
دورنالار دنیزه قوناق اولوردو
یارالی دورنانین گؤلمج ایچینده
گؤزلری دولوردو، رنگی سولوردو

دورنالار دنیزده دویون قورارکن
یارالی دورنانین قانی سوزوردو
یولداشلار یولداشی اونوتموشدولار
بیر دورنا دونیادان الین اوزوردو

ایچینده یالقیزلیق هارای چکیردی
قارانلیق چؤکوردو، قاش قارالیردی
دنیزلر بزه‌یی گؤزل دورنانین
جانینی آیریلیق دردی آلیردی

یادینا دوشوردو بیر آجی آغی
ایستیردی اوخشاسین، سون نفسینده
گؤیلره باخیردی، گؤلمج ایچینده
دونیانین سسلری، باتدی سسینده

«یارالی دورنایدیم، دومان ایچینده
قاتاردان آیریلدیم، قاتی دوماندا
یولداشلار گئتدیلر، یولدا قویدولار
دوغولموشدوم سانکی، یانلیش زاماندا»…

#میرحسین_دلداربناب
۱۴۰۲/۰۲/۲۰