طالبانلی یوخولار

 طالبانلی یوخولار

شعر از موسی احمدی مرند

گؤردوم چؤلده قاچیرام
بیر قاپینی آچیرام
بؤیوک امارت قوروب
گونش تکین ساچیرام

گؤردوم ایتلر قووالیر
ایتلر آتا یئم آلیر
منده نه قدر قاچیرام
توفان مندن توو آلیر

گؤردوم داغدا اسیرم
اؤلماغا تله سیرم
اما نئچه خوروزون
باشلارینی کسیرم

گؤردوم هئچدن آسیرلار
جندک لرده ساسیرلار
کسیلمیش دیل دوداغی
توربالارا باسیرلار

گؤردوم دارا چکیرلر
گولو خارا چکیرلر
اؤلنلرین اوستونه
میتیل قارا چکیرلر

گؤردوم ملت آغلیرلار
اؤرکلری داغلیرلار
آددیم باشی بازرس
خیاوانی باغلیرلار

گؤردوم هبت باش اولوب (هبت الله آخوندزاده) رهبر طالبان
داعشه قارداش اولوب
القاعده، طالبان
حقانی یولداش اولوب

گؤردوم اون ایل قوراقدی
عمرومه سون دوراقدی
عزرائیلین الینده
باش ایری بیر اوراقدی

گؤردوم اوشاق دوغولور
دوغولمامیش بوغولور
بیر آرواد داشلامادا(سنگساردا)
سوموکلری اوغولور

گؤردوم آتمیش یاشیمدا
بیراوخ واردی قاشیمدا
من کیشی اولا اولا
برقع واردی باشیمدا

T.me/jjavanefarda