چال آشیق

اورگیم سیخیلیر یاماندیر حالیم
بیر یانیق کرمی، منه چال آشیق
جیسمیمه جان وئر سین دویغوما قاناد
آیریلسین جانیمدان، هر ملال آشیق

قور قود دده میزدن، قالدین یادیگار
سنده کوراوغلونون، سازی سؤزو وار
یاخشی اول یاخشیدان یاخشی آد قالار
یاخشی بیلیر بونو هر ماحال آشیق

چالگینان دیلغمی گؤیلره قاخسین
کوراوغلو جنگیسی ظالمی یاخسین
سسین اوجالاندا هر زامان آخسین
گؤزللمه لردن، شیرین بال آشیق

اوستاد نامه ن اولدو دردیمه چارا
دویغومو قالدیردی اوجا داغلارا
اینسان اوغلو گئدر اولسا هر هارا
اونا یاراشیقدیر پرکمال آشیق

شؤهرتین یاییلیب بوتون جاهانا
دوغما گئییمیمیز یاراشار سانا
سارسیلان آداما، یاتان اینسانا
کئچنلردن سؤیله دالبادال آشیق

شنلیک گتیرنسن ، گول ائلیمیزه
چالمیسان تورک اولان بو ائلیمیزه
باکی، اردبیله، زنگان، تبریزه
همدان، اورمویا وئردین حال آشیق

دئیر دیلر سنه، بابالار اوزان
دیَر وئرردیلر دوققوز تئل سازان
یاشیل باغین سنین گؤرمه سین خزان
دونیا وارکن یوردوموزا قال آشیق

بیلیر سن، بیزیم یئر اودلو دیاردی
بواودلار یوردوندا حؤرمتین واردی
«سیّد» یاشا دولوب ساچلاری قاردی
او یازیغی هردن، یادا سال آشیق.

رحمتلی میر حسینقلی ریاحی فر