دئمک اولار طبیعت ، باشلانغیجدان بو گۆنه قدر هنرله ادبیاتین اساس قایناقلارینان بیری اولوب و اَن صاف بدیعی یارادیجیلیقلار

گیریش

میربهرام رستمی متخلص به خانلار دبیر ادبیات بازنشسته شاغل و دبیر محفل ادبی کتابخانه عمومی پارک شهر مرند

دئمک اولار طبیعت ، باشلانغیجدان بو گۆنه قدر هنرله ادبیاتین اساس قایناقلارینان بیری اولوب و اَن صاف بدیعی یارادیجیلیقلار اوندان قایناقلانمیش‌دیر. موسیقی، رساملیق، هیکل‌تراشلیق هابئله باشقا هنرلرده ده طبیعتین چوخ تاثیرلی ایزلری گؤرونور. بو تاثیر،  ادبیاتدا ، خصوصی‌له ده شعر‌ده چوخ گئنیش یئر توتور. شاعرلر طبیعت‌دن الهام آلاراق ان یۆکسک درجه‌ده شعرلرینی یارادمیشلار.
علیزاده بی ده داغچی‌لیق‌لا مشغول اولدوغو اۆچۆن هابئله طبیعتی چوخ سئودیگی اۆچون بو شاعرلردن بیریدیر. او بیر چوخ شعرلرینده طبیعت‌دن الهام آلمیشدیر. اگر بو شاعرین شعرلرینه دقت‌له باخساق، “باغ”، “گۆلشن”، “چمن”، “سوسن”، “سۆمبۆل”، “داغ”، “دره” کیمی سؤزلرین چوخلوغونو گؤره بیله‌ریک. ائله بونا گؤره ده اونا “طبیعت شاعیری” آدی وئریلمیش‌دیر.

بو شاعر دوْغولدوغو یئر اولان گۆله جار کندینین طبیعتینی چوخ سئویب، بیر پارا شعرلرینده دوْغما کندی‌له اونون طبیعتینی تصویر ائتمیش، کند اهالی‌سینی حؤرمتلی انسانلار کیمی قید ائتمیش‌دیر.

ائل‌لری یاز فصلی یایلاقدا قالار
حقیقته ساری دۆزگون یول سالار
حقیقت‌دن گؤزل بیر الهام آلار
چوخ گؤزل انسانلار وار گۆله‌جاردا

سئویرم باغلارین بارین
آلماسین هیواسین نارین
عقلیمی حئیران ائیله‌ییب
گۆل چیچه‌یی گۆله‌جارین

احمد علیزاده قلبینده اولان صمیمیت‌له  سئوگی‌یه گؤره انسانلارین حقین قورویوب هابئله ظالم‌لری قیناماقلا انسانلارا قان ایستی‌لیک‌له دۆزلۆیۆ هدیه ائتمه‌یه چالیشیر.
چوخ سئویرم عدلین میزی قورولا
آخار سولار آینا کیمین دورولا
ظالیمین خائنین بوینو وورولا
اجازه وئر گلسین او حجت آللاه

باشدان باشا دونیا اولوب غمخانا
خیانت ائیله‌ییر انسان انسان
کؤنلوم درد الیندن گلیب فغانا
بورویوب هریانی دومان گؤرورم

بیر پارا شعرلرینده آللاهین گؤزل باهار طبیعتینی یارادیش گۆجۆندن دانیشیب اونون تکلیگینی دیله گتیریر.

قربان اولوم خالیقیمده قدرته
گؤردوم جمالینی دوشدوم حئیرته
بئیله بیلدیم یوردوم دؤنوب جنته
بیر یاشیل یایلاغی من گؤره‌ن زامان

سنده واردی گؤزل عدالت آللاه
وئریبسن انسانا لیاقت آللاه
گۆل بوداغین مسکن ائدیب بولبوله
گۆلده یارالدیبسان طراوت آللاه

هردن ده دۆنیادان، زاماندان شکایت ائدیب اونو کؤتۆله‌ییر.

گون ایشیغین منه ساچان زاماندان
گؤزومو دونیایه آچان زاماندان
آیاق توتوب بوردا قاچان زاماندان
سالیبسان جانیما ولوله دونیا

بو شاعرین شعرلرینه باخدیقدا، اونون دوْغما یوردو اولان ایرانا، خصوصی‌له ده آذربایجان بؤلگه‌سینه، گۆله‌جار کندینه هابئله مرند شهرینه بؤیوک سئوگی بسله‌دیگی، دویغولارینی شعرله چاتدیر‌دیغینی گؤرۆرۆک.

من ایرانام قدرت کانی
ایگیدلریم غئیرت کانی
دؤرت بیر یانیم ثروت کانی
سینه‌م ده گوهریم واردی

چالیشین دونیاده پاک چؤرک یئیین
صداقت لباسین اگنیزه گئیین
احمد تکین وطنیزه جان دئیین
یانار اوجاغینی سئوین آی ائل‌لر

آی آغالار گلین سیزه سؤیله‌ییم
واردی عجب خوش هاواسی مرندین
یام-یاشیل گئیینیر باهار گلنده
گؤزل اولار تاماشاسی مرندین

هردن داغلارا خطاب ائدیب اۆرک سؤزلرینی، آرزولارینی اونلارا دانیشیر.

ظولوم کارلار سنین کؤنلون داغلاییر
یامان گۆنده کیم یاراوی باغلاییر
دورنا گؤزلو بولاقلارین آغلاییر
گؤز یاشلاری دؤنور عمانا داغلار

بو شاعر‌له هابئله اونون یاشامی ایله یاخیندان تانیشماق اۆچون اونون اؤز قلمیندن یازدیغی بیوگرافی‌سینی اوخویوروق:
« من احمد علیزاده، عباسعلی اوغلو، ۱۳۳۲جی ایلده مرند شهرینه باغلی گۆله جار کندینده آنادان اولموشام. یئددی یاشیم اولاندا آتام ساده بیر خسته‌لیکدن دۆنیاسینی دَییشدی. من او یاشدان آغیر کند ایشلری‌ ایله مشغول اولدوم. قیشدا کند ایشلری دایاندیغی اۆچون یاشامیمیزی دولاندیرماغا فرش توْخوماغا اۆز گتیردیم. سکگیز یاشیمدا قیش آیلاریندا بیر حؤرمت‌لی اؤیرتمنین یانیندا سعدی شیرازی‌نین “گلستان” کیتابینی اؤیرندیم.
۱۳۵۳جی ایلده عائله‌مله بیریلیکده مرند شهرینه کؤچۆب، اورادا دا فرش توْخوماقلا یاشامیمیزی کئچیندیرمه‌یه چالیشدیم. ائله او ایل‌لرده بئشیجی کلاسین امتحانلارینا سربست شکلده یازیلیب، همان ایلین سونوندا امتحانلاری قازاندیم. بو قازانجدان سونرا آموزش پرورش اداره‌سینده چایچی، گؤزتچی کیمی ایشه باشلادیم. بو ایش‌له یاناشی درسیمی دوام ائتدیررک ادبیات ساحه‌سینده دیپلم آلدیم. سونرا ایشیمی دییشیب، دفتردارلیق گؤره‌وینده ایشه باشلادیم.
شعره بؤیوک ماراغیم اولدوغو اۆچون مرحوم ماراغالی‌ اولان کریمی شاعرین شعرلرینین کتابین اوخویوردوم. بیر گون مدرسه‌ده اوشاقلارین والدین‌لریندن بیری منیم بیر شعریمی اوخویوب، منی مرحوم حاجی آغا محمدحسین علیزاده‌نین رهبرلیگی‌له هلال احمر اداره‌سینده کئچیریلن شعر مجلسینه یؤنلندیردی. او زماندان شعر یازماغا باشلاییب ایندی ده شاعرلرین دیوانلارینی اوخویوب شعر یازماغا دوام ائدیرم.

بو یولدا منه یول گؤسته‌ریب شعر یازماغا اۆرکلندیرن پارک شهر کتابخاناسی‌نین ادبی درنه‌یی و بۆتۆن یاردیم ائدنلردن، خصوصی‌له ده شعرلریمین حاضیرلاماسی ایلا چاپینی اۆستونه آلان خانلار آدی ایله تانینان میر بهرام رستمی بی‌‌دن  تشکر ائدیب، آدینی تانیدان بو ادبی درنه‌یین بیر پارچاسی اولدوغوما فخر ائدیرم.»

میر بهرام رستمی (خانلار)
آغلار گولر آیی نین ایکیسی ۱۴۰۴